導演矢口史靖之前作品都係有啲瘋狂搞笑，但今次就轉咗，笑仍有，但笑係變咗一種會心微笑，淚中有笑，甚至睇到最後，係幾令人安慰嘅笑。
個名叫 Survival Family，呢齣戲真係係講家庭，並唔係好偉大嗰啲世界話題、大道理、人類生死存亡嗰啲嘢，我睇到嘅，感受到嘅，係佢對家庭呢樣價值嘅肯定。
電影嘅開頭，呢一家人，你會睇到個老豆真係唔死都冇用，佢喺家庭之中係個得把口嘅角色，得唔到人尊重，而喺社會中，公司裏面，亦只有工作呢樣依歸，停電開頭幾日，佢掛住嘅唔係屋企人之後點樣生活落去，而係做嘢，公司啲嘢點算好，話要為有番電之後作好準備咁樣。
係好似依家大部分打工仔嘅心態，但呢齣戲裏面嘅都幾好笑，停電都仲要返工，為咗返工，大廈大門冇電開唔到都要打爛佢，為嘅，就係要入去 office 度坐！其實又真係幾諷刺，呢個世界上，又的確係好多人所謂嘅返工，就係返去坐同傾偈，上級話唔使返工，分分鐘仲突然唔知點算好。
鈴木嘅仔同女，都係都市人一般，仔就用耳筒隔絕咗自己同身邊環境，女就好依賴現代通訊科技。係深津絵里演嘅阿媽最正常，佢係唯一一個 make sense 嘅人，第一件事就係諗有冇得食，或者阿媽呢個角色就有呢個作用，佢係維持一個屋企最必要運作嘅重要角色。雖然呢個阿媽係都市版，劏魚都唔敢。
表面上，呢家人繼續咁落去，可以衰到四散，阿媽同老豆嘅感情係點，由一幕睇星可以睇得出。但內心，佢哋都唔知道，其實佢哋唔想咁樣，平時嘅生活，唔係咁開心，但又冇話想作出乜嘢改變，阿女同同學或朋友嘅相處，其實唔係咁想，但身邊啲人就係咁，又可以點樣。就因為呢個機會，阿女收起佢嘅強顏歡笑，學都費事返，返屋企好過。
呢個機會，令佢哋改變咗。之後嘅其實都估到，冇用嘅老豆，唔妥屋企嘅仔女，唔想一齊咁辛苦踩去咁遠嘅地方，變咗一齊經歷，趁呢個難得嘅機會，一家人好想喺埋一齊，去佢哋嘅目的地，享受過程。
另外有樣嘢就係日本發生咁嘅事都可以冇乜罪惡發生係好奇怪嘅，本來係可以拍到好可怕，但導演揀咗冇咁樣做。我認為，呢個故事係講一個有裂痕嘅家，因經歷而復完，可以話係著重個人而唔係宏觀嘅嘢，呢個世界停電係點，對佢哋嚟講其實唔太著緊。而睇完係幾令我開心同舒服嘅。
dieman
沒有留言:
發佈留言